पाँचथरको हिलिहाङ-६ ढकालगाउँ नजिक मेची राजमार्गको फिदिम–ताप्लेजुङ सडकखण्डमा ट्रक दुर्घटना हुँदा एकजनाको ज्यान गएको छ। ना ४ ख ७१२३ नम्बरको ट्रक दुर्घटनामा परी हिलिहाङ-३ साम्रेका ५७ वर्षीय भवानीशंकर पौडेलको घटनास्थलमै मृत्यु भएको हो।
दुर्घटनामा इलाम सुर्योदय नगरपालिका-१२ निवासी ५२ वर्षीय तेजबहादुर दास र झापा चारपानेका ४० वर्षीय राजकुमार बस्नेत गम्भीर घाइते भएका छन्। उनीहरुको शरीरका विभिन्न अंगमा चोट लागेको र अवस्था गम्भीर भएकाले पाँचथर अस्पतालबाट झापास्थित बीएन्डसी अस्पतालमा थप उपचारका लागि रेफर गरिएको छ।
जिल्ला प्रहरी कार्यालय पाँचथरका सूचना अधिकारी बेनिलाल साहका अनुसार, ट्रक हिलिहाङ-१ सिंहापुरबाट झापाका लागि गोलिया बोकेर जाँदै गरेको थियो।