काठमाडौं – देशभर पश्चिमी र स्थानीय वायुको आंशिक प्रभाव कायम छ। जल तथा मौसम विज्ञान विभाग, मौसम पूर्वानुमान महाशाखाका अनुसार हाल पहाडी क्षेत्रमा आंशिक बदली छ भने बाँकी भू–भागमा मौसम प्रायः सफा रहेको छ।
आइतबार दिउँसो देशका पहाडी क्षेत्रमा आंशिक बदली रहनेछ भने अन्य क्षेत्रमा आंशिक बदलीदेखि मुख्यतः सफा रहने सम्भावना रहेको महाशाखाले जनाएको छ। यसैगरी, पहाडी क्षेत्रका केही स्थानमा मेघ गर्जन र चट्याङसहित हल्का वर्षा हुन सक्नेछ भने उच्च पहाडी तथा हिमाली क्षेत्रका केही स्थानमा हल्का हिमपातको सम्भावना रहेको छ।
राति पनि पहाडी भू–भागमा आंशिक बदली रहने र अन्य क्षेत्रमा मौसम मुख्यतः सफा रहने महाशाखाको पूर्वानुमान छ। यस अवधिमा पनि पहाडी क्षेत्रका केही स्थानमा हल्का वर्षा तथा हिमाली क्षेत्रका केही स्थानमा हल्का हिमपातको सम्भावना रहेको छ।