एक महिलाको घाँटी रेटेर हत्या गरेको अभियोगमा प्रहरीले दुई जनालाई पक्राउ गरेको छ । भक्तपुरको नागपोखरी बस्दै आएकी २८ वर्षीया जेनिशा।
नगरकोटीको हत्या आरोपमा महानगरी प्रहरी परिसर भक्तपुरले दुई जनालाई पक्राउ गरेको हो ।पक्राउ पर्नेमा काभ्रेको नमोबुद्ध नगरपालिका–२ भकुण्डेबेसीका ४४ वर्षीय कुमार लामा र भुम्लु गाउँपालिका–४ चौवासका ३८ वर्षीय नवराज रिजाल रहेका छन् । प्रहरीले उनीहरूलाई बुधबार पक्राउ गरेको हो ।
गत सोमबार बेलुकी भक्तपुरको चाँगुनारायण–७ बागरेस्थित तरकारी खेतीबारीमा रहेको टिनको कच्ची टहरा भित्र घाँटी रेटि हत्या भएको अवस्थामा युवतीको शव भेटिएको परिसरका प्रहरी नायव उपरीक्षक डीएसपी राजु पाण्डेले जानकारी दिनुभयो ।
उहाँका अनुसार घटनामा चक्कुले मृतकको घाँटी रेटी हत्या गरेको अनुसन्धानबाट देखिएको छ । मृतक नगरकोटी र अभियुक्त लामा एउटै नागपोखरीको एउटै घरमा बस्ने गरेको र उनीहरूबीच शारीरिक सम्बन्ध पनि हुने गरेको प्रहरीको प्रारम्भिक अुनसन्धानबाट खुलेको डीएसपी पाण्डेले बताउनुभयो ।
लामा लागू पदार्थ ओसारपसार तथा खरिदबिक्री मुद्दामा १० वर्ष जेल भुक्तान गरेका व्यक्ति भएकाे प्रहरीले जनाएकाे छ । घटना भएको साँझ अभियुक्त दुई जना र मृतक एकै ठाउँमा बसेर मादक पदार्थ सेवन गरेको र सोही क्रममा वादविवाद हुँदा घटना भएको उहाँको भनाइ छ ।
बिहीबार अभियुक्त द्वयविरुद्ध ज्यान सम्बन्धि कसुरमा भक्तपुर जिल्ला अदालतबाट कर्तब्य ज्यान मुद्दामा सात दिनको म्याद थप गरी अनुसन्धान भइरहेको प्रहरीले जनाएको छ ।